Bermeoko Udala

Bermeoko odol emaileak omentzeko ekitaldia egin zen joan den zapatuan, urriaren 14an, Kafe Antzokian. 20-25 odol emate egiteagatik, 59 bermeotar zeuden deituta omenaldira, baina guztiek ezin izan zuten parte hartu. Bertaratutakoek diploma bana jaso zuten, talde argazkia atera, eta, ondoren, mokadutxoa jateko aukera izan zuten.

Ekitaldian, besteak beste, Alvaro Larreak eta Victor Mansok, Bizkaiko Odol Emaileen Elkarteko presidenteak eta koordinatzaileak, hurrenez hurren; Iñaki Zaratek, Bermeoko odol emaileen elkarteko arduradunak, eta Irune Ormaetxeak,  Bermeoko Urigintza, Turismo, Kirol eta Garapenerako zinegotziak, parte hartu zuten. 

Ormaetxeak eskerrak eman zizkien odol emaile guztiei euren ekarpenarekin “erakusten duten elkartasunagatik”, eta “merezitako omenaldia” dela azpimarratu zuen. “Herri modura harro egon behar gara dagoen odol emaile kopurua kontuan hartuta”, adierazi zuen. 

Zaratek odol emaileak odola ematen jarraitzera animatu zituen; izan ere, azpimarratu zuenez, “odola ematea bizitza ematea da”.