Albisteak

Albistea

‘Kontzientzia sortzaileek’ bermeotarrak herriko garbitasunarekin inplikatuko dituzte

Udalak bi langile kontratatu ditu, herriaren irudia eta herritarren kontzientziazioa hobetzeko

Gainera, Bermeoko Udalak beste bi proiektu martxan jarri ditu: ‘Alde Zaharreko dinamizazioa’ eta ‘Behargintzako bezeroen artxiboen eguneratzea’ 

Bermeon, 2020ko urtarrilaren 29an.- Bermeoko Udal Gobernuaren helburu estrategikoetako bat da ‘Bermeo garbi’ deritzona. Helburu estrategiko hori garatzeko Gobernu taldeak legealdi hasieran hainbat azpi-eremu definitu zituen eta gaur, herriko alkate Aritz Abaroak, hauetako bat aurkeztu du: ‘Kontzientzia sortzailearen’ figura, hain zuzen ere. Bermeon bizi diren eta Udalak 5 hilabetetarako kontratatu dituen bi pertsona herrian zehar lanean ibiliko dira herritarren arteko elkarbizitza hobetzea helburu hartuta.

Beraien lana oso garrantzitsua izango da, herritarrak herriaren garbitasunarekin eta behar bezalako antolakuntzarekin sentsibilizatu eta inplikatzea bilatuko dutelako. Izan ere, herria bera garbi egongo da bermeotarrek garbitasunarekin konpromisoa erakusten badute. Kontzientzia sortzaileek elkarbizitza hori hobetzeko hiru esparrutan lan egingo dute: herritarren portaera arauetan, ingurumenarekin zerikusia dutenetan eta, animalien jabeei dagozkien jokabideetan. Bi langileek hiru arlo hauetan sentsibilizazio kanpainak abiaraziko dituzte, herritarrak behar bezala informatuz.

Kontzientzia sortzaileek, besteak beste, zigarro puntak sastarretara botatzeko garrantziaz hitz egingo diete erretzaileei, birziklatzearen onurak azalduko dizkiete herritarrei eta txakurren kakek sortu ditzaketen arazoez ohartaraziko diete animalien jabeei. Azken helburua herriaren irudia eta herritarren kontzientziazioa hobetzea izango da

Alde Zaharreko dinamizazioa eta Behargintzako bezeroen datuen eguneratzea:

Gainera, Bermeoko Udalak beste bi proiektu martxan jarri ditu: ‘Alde Zaharreko dinamizazioa’ eta ‘Behargintzako bezeroen artxiboen eguneratzea’. Lehenbizikoari dagokionez, Alde Zaharrerako dinamizazio kanpainen sormena da helburua. Hau lortzeko bi pertsona kontratatu dira (enpresa arloko aditu bat eta Arte Ederretan aditua den beste bat). Proposatutako kanpainen bitartez herritarrak, turistak eta negozio berriak Alde Zaharrera erakarri nahi dira. Gainera, Alde Zaharraren potentziala ikusarazi nahi da sormen kanpaina hauen bitartez. Proiektuak 6 hilabeteko iraupena izango du.

Azken proiektuak Behargintzako bezeroen artxiboen eguneratzea du helburu. Behargintza sortu zenetik (2001), 6.700 bezeroren informazioa artxiboetan gorde da eta datu hauek eguneratu nahi dira, Behargintzaren zerbitzuaren kalitatea hobetzeko. Lan hau aurrera eramateko sei hilabeterako bi pertsona kontratatu dira.

29 / 01 / 2020

Beste barriak

Bermeoko Udala

010 (94 617 91 00)
Arana eta Goiri tar Sabinen
enparantza z/g
48370 Bermeo - Bizkaia
antolakuntza@bermeo.eus

bikain ziurtagiria WAI-AA WCAG 1.0